Saturday, 21 February 2015

ရေတမာနဲ့ ခရေတည်ရာဆီ (၄)

February 21, 2015 2 Comments




အဝေးက မှိုင်းညို့ညို့တောင်တန်းတွေ၊ ရေကန်ပြာပြာထဲက လှိုင်းကြက်ခွပ်ကလေးတွေ၊ တောင်တန်းတွေ ထက်က တိမ်စိုင်တိမ်လိပ်တွေ၊ ရေကန်နံဘေးက ခဲလုံးလေးတွေ၊ မြက်ရိုင်းပင်လေးတွေအထိ တစ်ခုမကျန် အသေးစိတ် အမှတ်တရရှိနေတဲ့အခါ အလွမ်းဆိုတာ သက်ရှိတွေကိုသာမကဘဲ သက်မဲ့အရာတွေပေါ်မှာ လည်း ထိရှခံစားတတ်တဲ့အရာပါလားလို့ .... အသိအမှတ်ပြုမိလာခဲ့တယ်.....။

ရေကန်ဘေးက ယူကလစ်ပင်တွေထက် လာနားခိုလေ့ရှိတဲ့ ငှက်မောင်နှံတွေ၊ ရေကန်ထဲမှာ လူးလာကူးခတ်နေတတ်တဲ့ ဘဲငန်းရောင်စုံတွေ၊ ငါး အရွယ်စုံတွေကိုလည်း တခုတ်တရ မျှော်ငေးမိတဲ့ အခိုက်အတန့်ဆိုတာလည်း မကြာခဏကြုံလာတဲ့အခါ အတိတ်ဟာ ဘဝမှာ ခြေရာချင်းထပ် လိုက်ပါလာတဲ့ အရာလို့လည်း နောင်တမဲ့စွာ တွေးတတ်လာခဲ့တယ်....။

အလွမ်းတွေက မြက်ရိုင်းပင်တွေရဲ့ အရေအတွက်ထက် ပိုသာနေတဲ့အခါ၊ ရေကန်ရဲ့ ဟိုးအဝေးကြီး ထိ ပြိုင်တူပစ်ခဲ့ဖူးတဲ့ ခဲလုံးလေးတွေထက် ပိုများနေတဲ့အခါ၊ တောင်တန်းကြီးတွေထက် ထုထည်ပိုကြီးနေတဲ့ အခါ၊ ရေကန်ထဲက ရေတွေနဲ့ထပ်တူ ပမာဏတိုင်းတာလို့မရတဲ့အခါ၊ လျှောက်လှမ်းခဲ့တဲ့ ခြေရာတွေလိုပဲ .မရေမတွက်နိုင်တဲ့အခါ အလွမ်းရဲ့နောက်ဆက်တွဲအဖြစ် ဘယ်အရာကိုမှ ပြုပြင်ဖန်တီးမရနိုင်တဲ့ အခြေအနေမှာ အမှတ်တရအဖြစ် သိမ်းဆည်းရုံကလွဲလို့ တတ်နိုင်တာ မရှိခဲ့ဘူးမဟုတ်လား ..။

စကားလုံးတွေက ဖြူစင်မှုတွေချည်း ဖြစ်ခဲ့တဲ့အချိန်တွေ၊ သံယောဇဉ်တွေက ခရေတွေ ဇွန်ပွင့်ဖြူဖြူတွေလို ရေတွက်မရအောင် များပြားလှတဲ့ကာလတွေ၊ ရယ်မောသံတွေဟာ မာယာပရိယာယ် ဟန်ဆောင်မှုမရှိတဲ့ ရိုးရှင်းမှုတွေသာ လွှမ်းခြုံနေတတ်တဲ့နေ့ရက်တွေ၊ အိပ်မက်တွေမှာ ပျော်ရွှင်စရာ အနာဂတ်တွေသာ လွှမ်းမိုးခဲ့ဖူးတဲ့ အခိုက်အတန့်တွေ စသဖြင့် အတိတ်ဟာ ပြန်တွေးမိတိုင်း ပစ္စုပ္ပန်နဲ့ ခြားနားနေပေမယ့်လည်း ကြည်နူးဖွယ်ရာ နေ့ရက်တွေတော့ ဖြစ်လို့နေခဲ့ပါတယ်...။

Sunday, 15 February 2015

#My #Instagram

February 15, 2015 2 Comments


ဒီရက်ပိုင်းတွေမှာ Blogging ချင်ပေမယ့် အချိန်မရဘူးဖြစ်နေတာ ကြာပြန်ပြီ ...။ တကယ်ကတော့ ထုံးစံအတိုင်း Time Management ညံ့တာပါပဲ ..။ အဲဒီတော့ နားချိန်နား၊ အလုပ်ချိန်အလုပ် မဟုတ်ဘဲ ဟိုလိုလို ဒီလိုလို အလုပ်လည်း မှန်းသလောက် မပြီးသလို သေသေချာချာ အနားယူရတယ်လည်း မဟုတ်သေးဘူး...။ မကောင်းတဲ့အကျင့်မှန်းသိပေမယ့် မစွန့်နိုင်သေးပြန်ဘူး ...။ တစ်ခုက ငပျင်းတွေရဲ့ ညည်းချင်းအတိုင်းပြောရရင် ဆောင်းရာသီကြောင့်လည်း ပါပါတယ်..။ မနက်ဆိုရင် အရမ်းအေးတော့ အစောကြီးမထနိုင်ဘူး..။ အစောဆုံးက မနက် ၉ နာရီပဲ ..။ မနက်အိပ်ရာနိုးရင် ဟိုပြင်ဒီပြင်နဲ့ ကျောင်းကို ၁၁ နာရီကျော်မှ ရောက်တယ်..။ ရောက်တော့ နေ့လည်စာစား ကော်ဖီသောက်နဲ့ ၁ နာရီဖြစ်သွားရော..။ အဲဒီတော့ မနက်ပိုင်းတစ်ခုလုံးက ဒီအတိုင်းကြီး လွှင့်ပစ်လိုက်ရသလို ဖြစ်နေတာ နှမျောဖို့ကောင်းတာ ..။ ညရောက်တော့လည်း တော်တော်နဲ့ အိပ်မပျော်ပြန်ဘူး ..။ ကျောင်းမှာ ၈ နာရီလောက်ထိ နေခဲ့ပြီးတော့ စာတော့ဆက်လုပ်လို့ မရတော့ပေမယ့် ဟိုယောင်ယောင် ဒီယောင်ယောင်နဲ့ပဲ တခါတလေဆိုရင် မနက် ၃ နာရီလောက်မှ အိပ်ပျော်တယ်....။ ခုလောလောဆယ် .. အချိန်တွေက အဲလိုတွေဖြစ်နေပြန်ပါတယ်....။ ရာသီဥတုသာသာယာယာဖြစ်လာရင်တော့ ပုံမှန်အတိုင်းပြန်ဖြစ်မယ်လို့ မျှော်လင့်ရပါတယ်...။

ဒီတလောက Facebook ကို မကြိုက်တော့လို့ ဟိုအရင်လို မသုံးဖြစ်တော့ဘူး ...။ ခဏတဖြုတ်ကြည့်ပြီးရင် ပြန်ပိတ်ရင်ပိတ် မပိတ်ရင် Deactivate လုပ်တယ်..။ မလုပ်လည်း သိပ်တော့ မကြည့်ဖြစ်ပါဘူး ...။ အခုတလော Instagram ကို သုံးရတာ ကြိုက်နေတယ်...။ Instagram က အခြားနိုင်ငံတော်တော်များများမှာ အသုံးများလာကြပေမယ့် မြန်မာနိုင်ငံမှာတော့ သိပ်မတွင်ကျယ်သေးဘူးထင်တယ်...။ သူက Facebook လိုမျိုး status တင်တာတို့ စာတွေအများကြီး ရိုက်တာတို့ လုပ်လို့မရဘူး...။ အဓိကက ဓါတ်ပုံရယ် Caption ရယ်လောက်ပဲ ဦးစားပေးတင်လို့ရတယ်..။ အဲဒီတော့ တစ်ခုခုဆိုရင် Facebook မှာလို ပွဲဆူစရာအကြောင်း မရှိတော့ဘူးပေါ့ ...။ 

အဲဒီမှာကြိုက်တဲ့ Feature တစ်ခုက #ခံပြီး description ရေးတာကို သဘောကျတာ ..။ အဲဒီလိုဆိုရင် ကိုယ်တင်လိုက်တဲ့အကြောင်းအရာနဲ့ဆင်တူတဲ့ Post တွေကို အလွယ်တကူကြည့်လို့ရတယ်ဆိုတော့ သူ့အမျိုးအစားအလိုက် တစုတစည်းတည်း ကြည့်လို့ရသွားတာ..။ နောက်ကြိုက်တဲ့တစ်ချက်က ဓါတ်ပုံတွေကို Download လုပ်မရတာကို ကြိုက်တာ ...။ အနည်းဆုံးက screenshot လောက်ပဲရတာ ဆိုတော့ ကိုယ့်ဓါတ်ပုံတွေက အခြားသူတွေလက်ထဲ ရောက်သွားစရာအကြောင်းမရှိတော့ အန္တရာယ်ကင်းတယ်...။ Facebook ဆိုရင် ကိုယ်တင်လိုက်တဲ့ဓါတ်ပုံရဲ့ quality အတိုင်း တစ်ထပ်တည်း Download လုပ်လို့ရတော့ ဘာပဲဖြစ်ဖြစ် သိပ်မလုံခြုံဘူးပေါ့လေ...။ 

နောက်ထပ်ကြိုက်တဲ့တစ်ချက်က ဓါတ်ပုံတွေကို edit လုပ်တာ..။ အဲဒီမှာ Filters တွေကပြောင်းပေးတဲ့ အရောင်လေးတွေက ဓါတ်ပုံကို ပိုပြီးကဗျာဆန်သွားစေတယ်လို့ထင်တယ်...။ ဘာရယ်မဟုတ်ဘဲ Instagram မှာဆိုရင် အစားအသောက်ပုံတွေပဲ တင်ချင်တဲ့စိတ်ဖြစ်တယ်...။ အဲဒါသုံးရတာ Facebook လို ပွဲမဆူတော့ ဘာမှလိုက်မကြည့်ဖြစ်တဲ့အခါ အချိန်မကုန်ဘူး ....။ ကိုယ်ရိုက်ထားတဲ့ ဓါတ်ပုံလေးတွေ share လို့ရတဲ့အခါ အပျင်းပြေပြီး စိတ်ငြိမ်းချမ်းတယ်...။ အဲဒီတော့ Instagram သုံးရတာကို ပိုပြီး သဘောကျနေပါတယ်ဆိုတဲ့အကြောင်းပါပဲ ...။

Friday, 6 February 2015

#Setsubun #Okonomiyaki #Pancake

February 06, 2015 1 Comments
၂၀၁၅ ခုနှစ် ဖေဖော်ဝါရီလ ၃ ရက်နေ့ဟာ ဂျပန်မှာတော့ ဆောင်းရာသီနဲ့ နွေဦးရာသီ တို့ ၂ ခု ရဲ့ ရာသီကူးပြောင်းတဲ့နေ့ဖြစ်ပါသတဲ့ ...။ အဲဒီနေ့မှာ ဂျပန်နိုင်ငံရဲ့ ဘုရားကျောင်း (Temples) တွေမှာ မြန်မာလိုခေါ်ရင် ဘုရားပွဲလို့ ပြောရမလားပဲ..။ အဲဒီလိုပွဲမျိုးကို စည်စည်ကားကားကျင်းပကြပါတယ်..။ ရည်ရွယ်ချက်ကတော့ ဆောင်းရာသီကုန်လို့ နွေဦးရာသီကို ကူးပြောင်းတဲ့အတွက် နှစ်သစ်ကိုကြိုတဲ့အထိမ်းအမှတ်ရယ်၊ နှစ်သစ်မှာ မကောင်းတာတွေ ပါမလာအောင် မကောင်းတာတွေကို စွန့်ပစ်တဲ့အထိမ်းအမှတ်ရယ်အနေနဲ့ ကျင်းပကြခြင်းဖြစ်ပါတယ်တဲ့.။  မြန်မာပြည်က ဘုရားပွဲတွေလိုမျိုးပဲ ကလေးကစားတာတွေ၊ ရိုးရာမုန့်ဆိုင်တွေ၊ အမှတ်တရပစ္စည်းဆိုင်တွေနဲ့ လူတွေကလည်း တိုးမပေါက်အောင် စည်ကားလှပါတယ်..။ အဲဒီနေ့မှာ ဂျပန်ရိုးရာ ပဲနီစေ့လှော်ကို ရွှေရောင်၊ ငွေရောင် စက္ကူတွေနဲ့ ထုပ်ထားပြီး ကျဲပက်ခြင်းအားဖြင့် မကောင်းတဲ့အရာတွေအားလုံးကို အဝေးရောက်အောင် သုတ်သင်ရှင်းလင်းပစ်လိုက်တယ်လို့ အယူရှိပါတယ်..။

အဲဒီ ၃ ရက်နေ့မတိုင်ခင်တစ်ရက်ကတည်းက ကျောင်းနဲ့ကပ်ရက်မှာရှိတဲ့ ဘုရားကျောင်းမှာ ပွဲတော်စလို့ ဈေးတန်းတွေ ရောင်းချနေကြပြီး လူတွေ စည်ကားနေကြပါပြီ..။ မြန်မာလိုဆိုရရင်တော့ ပွဲတော်အကြိုနေ့ပေါ့လေ..။ ဒါပေမယ့် ပွဲကြီးနေ့ ၃ ရက်နေ့ ညနေမှပဲ သူငယ်ချင်းတွေနဲ့ ဘုရားသွားရင်း ပွဲဈေးတန်းလျှောက်လည်ဖြစ်ခဲ့ပါတယ်..။ ဂျပန်ရိုးရာမုန့်တွေ၊ အသားကင်မျိုးစုံ၊ ကျမကြိုက်တဲ့ တူရကီအစားအစာတစ်မျိးဖြစ်တဲ့ Doner Kebab ဆိုင်တွေ စသဖြင့် မုန့်ဆိုင်တွေ အများကြီးရှိသလို ငါးသေးသေးလေးတွေ၊ လိပ်သေးသေးလေးတွေ ဖမ်းတာကအစ သေနတ်ပစ်ကစားတာ၊ အရုပ်ပစ်တာ စသဖြင့် ကလေးတွေကစားစရာ ဆိုင်တွေလည်း များပြားလှပါတယ်...။ အမှတ်တရပစ္စည်းဆိုင်တွေလည်း အများကြီးပါပဲ ...။





ဈေးတန်းထဲကို သွားသွားချင်း စားဖို့အတွက် ပထမဆုံးရှာတာက ဂျပန်ရိုးရာ Pancake ဖြစ်တဲ့ Okonomiyaki လို့ခေါ်တဲ့ သရေစာတစ်မျိုးပါ ...။ ဂျပန်တွေ အဲဒီအစားအစာကို တော်တော်ကြိုက်ကြလို့ ဆိုင်တွေဆိုတာလည်း အများကြီး တွေ့ခဲ့ရပါတယ်...။ ကိုယ့်ပုံစံနဲ့ ဆန်းသစ်ပြီး ပုံစံမျိုးစုံနဲ့ အဲဒီမုန့်ကို လုပ်ရောင်းကြတာ တွေ့ရပါတယ်...။ ဒါပေမယ့် အဓိကပါဝင်ပစ္စည်းတွေဖြစ်တဲ့ ဂေါ်ဖီထုပ်၊ ရှောယုငံပြာရည်၊ mayonnaise တို့ကတော့ မပါမဖြစ်ပါရပြီး လုပ်တဲ့ပုံစံကတော့ တစ်ပုံစံတည်းပါပဲ..။ မတူတာတွေက အချို့က ခေါက်ဆွဲကြော်ကို အဆာအနေနဲ့ ထည့်တာရှိသလို၊ ဝက်သားပြားဖြစ်စေ၊ ရေဘဝဲဖြစ်စေ ထည့်ကြော်တဲ့ဆိုင်တွေလည်း တွေ့ရပါတယ်..။



မုန့်လုပ်နည်းမှာတော့ အဓိကအားဖြင့် Kansai စတိုင်လ်နဲ့ Hiroshima စတိုင်လ် ဆိုပြီး ၂ မျိုးရှိပါတယ်..။ လုပ်ပုံလုပ်နည်း အသေးစိတ်ကို သိချင်ရင်တော့ ဒီလင့်ခ် မှာ ကြည့်လို့ရပါတယ်..။ ကိုယ်တိုင်လုပ်ရင်တော့ ဘယ်လို အရသာရှိမလဲ မသိပေမယ့် စားရတာတော့ တော်တော်ကောင်းပါတယ်..။ ကျမက အသီးအရွက်ပိုကြိုက်တဲ့သူဖြစ်တာကြောင့်လည်း ဂေါ်ဖီသေးသေးနုပ်နုပ်ကလေးတွေထည့်ထားတဲ့မုန့်ကို ကြိုက်မိတာ ဖြစ်ချင်လည်း ဖြစ်ပါလိမ့်မယ်..။ အစားအသောက်ဝါသနာပါသူဆိုရင်တော့ စမ်းလုပ်စားကြည့်ပါ..။ တကယ်ကြိုက်သွားမယ်ထင်ပါတယ်...။

နောက်တော့ လျှောက်ကြည့်ရင်းနဲ့ ဟိုစပ်စပ်ဒီစပ်စပ် လျှောက်သွားလျှောက်စားကြပါတယ်.....။

ဒါကတော့ ကိုယ်တိုင်လုပ် Honey pancake ပါ..။ ဒီမှာလည်း ဒီလို Pancake မျိုးကို တော်တော် စားကြကြိုက်ကြတာကို တွေ့ရပါတယ်...။ လုပ်ရတာက သိပ်မခက်ခဲဘဲ အချိန်လည်း သိပ်မပေးရတော့ မနက်စာကို တခါတလေ ဒီလို လုပ်စားတာလည်း အပြောင်းအလဲ တစ်ခုပါပဲ ...။ ပြီးတော့ အာဟာရလည်း ပြည့်ဝတယ်လေ..။ ပါတာက ကြက်ဥရယ်၊ ဂျုံ ရယ်၊ နွားနို့၊ ပျားရည်ဆိုတော့လည်း ပြည့်ပြီပဲပေါ့နော့ ..။


Tuesday, 3 February 2015

31st January 2015 ~~

February 03, 2015 3 Comments

၂၀၁၅ ခုနှစ် ဇန်နဝါရီလ ၃၁ ရက်..........

မနက်ခင်းဟာ သာသာယာယာနဲ့ ရောက်ရှိလာခဲ့တယ်..။ အအေးပိုင်းနိုင်ငံတစ်ခုရဲ့ ဆောင်းတွင်းအလယ်ပိုင်းကာလ ရက်တစ်ရက်ဖြစ်နေပေမယ့်လည်း နေရောင်တချို့က ပြတင်းတံခါးကနေဖြတ်ပြီး အခန်းထဲထိတိုင် ဝင်ရောက်လာခဲ့ပါတယ်...။ အိမ်နဲ့ မနီးမဝေးမှာရှိတဲ့ ကစားကွင်းကနေ Tennis ရိုက်လို့ ဆူညံသံတွေ ကြားလိုက်ရကတည်းက ဒီနေ့ဟာ နေသာတဲ့နေ့တစ်နေ့ပါလားဆိုတာ သိလိုက်ပါတယ်...။
နံနက်မှာ ဘုရားရှိခိုး ပြင်ဆင်စားသောက်ပြီး အိမ်နဲ့ ဖုန်းပြောပါတယ်..။ အဲဒီနေ့က ကျောင်းမှာ reading class က မနက် ၁၀ နာရီစမှာဆိုတော့ ပြေးပြေးလွှားလွှားပြောဆိုပြီး ကျောင်းကို အမြန်သုတ်ခြေတင်ပြေးရပါတယ်...။ မနက်ပိုင်းတစ်ခုလုံးလိုလို  စာဖတ်ဝိုင်းနဲ့တင် ပြီးသွားခဲ့ပါတယ်...။ နောက်တော့ ဈေးဝယ်၊ အိမ်ခဏပြန်ပြီး ညနေပိုင်းမှာ သူငယ်ချင်းတွေနဲ့ Gathering လုပ်ပါတယ်...။ 

အဓိက ချက်တာက အုန်းထမင်း၊ ကြက်သားဟင်း၊ ဘာလချောင်ကြော်၊ ချဉ်စော်ခါးသီးချဉ်ရည်ဟင်းကို တစ်ယောက်တစ်မျိုး ဝိုင်းဝန်းချက်ကြပါတယ်...။ ကြားထဲမှာတော့ အသီးမျိုးစုံထည့်တဲ့ Cocktail လုပ်တယ်.။ ဖက်ထုပ်ကင်၊ Nuts၊ အာလူးကြော် ဘာညာသာရကာတွေလည်း စားရင်းသောက်ရင်း၊ ပြောရင်းဆိုရင်း ရယ်ရင်းမောရင်းနဲ့ပေါ့...။


ဒီလိုနဲ့ပဲ ၂၀၁၅ ခုနှစ်အတွက် ကျမရဲ့ မွေးနေ့ဟာ မိသားစုနဲ့ အဝေးမှာရောက်နေပေမယ့်လည်းပဲ သူငယ်ချင်းတွေ မောင်နှမတွေနဲ့အတူ ပျော်ပျော်ရွှင်ရွှင်ဖြတ်သန်းဖြစ်ခဲ့ပါတယ်..။ သူတို့စီစဉ်ပေးတဲ့ ချောကလက်မွေးနေ့ကိတ်ဟာ ကျမအတွက်တော့ ပျော်စရာအမှတ်တရတစ်ခုပါပဲ ..။ ချိုအီနေတာတွေ မကြိုက်တဲ့ကျမအတွက် ခါးသက်သက်အရသာပါတဲ့ ချောကလက်ကိတ်ဟာ အကြိုက်တွေ့စေတဲ့ မွေးနေ့ကိတ်ဆိုတော့ သူငယ်ချင်းတွေစီစဉ်ပေးတာနဲ့ ကျမအကြိုက် ကွက်တိဖြစ်စေခဲ့ခြင်းဟာ ကြည်နူးစရာပါ ...။


မှတ်မှတ်ရရ ဒီနှစ်ဟာ ကျမအတွက် မွေးနေ့ကိတ်ကို ၂ ကြိမ်တိုင်တိုင် လှီးခဲ့ရတဲ့ အမှတ်တစ်ရနှစ်တစ်နှစ်ပါ ..။ ကျမရဲ့ ဆရာ မွေးနေ့ကလည်း ကျမနဲ့ တစ်ရက်တည်း ၃၁ ရက်နေ့ပဲဖြစ်ကြောင်း မှတ်မှတ်ရရသိခဲ့ရပါတယ်..။ ၃၁ ရက်နေ့က စနေနေ့ဖြစ်နေတာကြောင့် ၃၀ ရက်နေ့ သောကြာနေ့မှာ ဆရာ့အတွက် အမှတ်တရမွေးနေ့ကိတ်ကို Lab. တစ်ခုလုံးက ကျောင်းသားတွေ စုပြီး ပြင်ဆင်ကျင်းပခဲ့ပါတယ်..။ အဲဒီမှာ ကျမရဲ့မွေးနေ့ကလည်း အတူတူဖြစ်တာကြောင့် ကိတ်ကို ကျမကိုလည်း ဆရာက လှီးစေခဲ့တာပါ..။ အဲဒီမှာ တွေ့ရတာက ကျမတို့ဆီမှာလို မွေးနေ့ကိတ်ကို မွေးနေ့ရှင်က အခြားသူတွေကို ခွံ့မကျွေးပါဘူး..။ အဲဒါလည်း ကောင်းတာာပါပဲ ..။ မဟုတ်ရင် လူတိုင်းရဲ့ ပါးစပ်ထဲ ဇွန်းတစ်ချောင်းထဲထည့်တာ ကောင်းတဲ့ဓလေ့တော့ မဟုတ်တော့ ကျမက အမြဲလိုလို စားဖို့ ရွံ့နေတတ်တာနဲ့ အကိုက်ဖြစ်နေတော့တာပေါ့ ..။ အိမ်မှာဆိုရင်တော့ တစ်ပန်းကန်စီထည့်ပေးပြီးမှ တစ်ယောက်ချင်းရဲ့ ဇွန်းကိုယ်စီနဲ့ပဲ ခွံ့ကျွေးတဲ့ဓလေ့ကို ကျင့်သုံးပါတယ်..။ 

 
 ဒါက ဆရာ့အတွက် မွေးနေ့ကိတ်


ကျမရဲ့မွေးနေ့ဟာ ပျော်ရွှင်မှုတွေ၊ ရယ်မောသံတွေနဲ့အတူ ပြီးဆုံးသွားခဲ့ပါတယ်..။ သာယာတဲ့ရာသီဥတုမှာ နှင်းပွင့်လေးတွေ ခပ်ပါးပါးကျနေခြင်းက နှင်းကိုချစ်တဲ့ကျမအတွက် ပျော်စရာအမှတ်တရတစ်ခုဖြစ်နေခဲ့ပါတယ်..။ ကျမရဲ့ အဝေးကြီးမှာ ရောက်နေပေမယ့်လည်း နေ့ရက်တွေ အချိန်တွေ လွဲနေပေမယ့်လည်း မှတ်မှတ်ရရ Birthday wish ကို အချိန်ကိုက်ပြောပေးတတ်တဲ့ ချစ်သူကလည်း အမှတ်တရတွေထဲက အရေးကြီးတဲ့ အမှတ်တရတစ်ခုပါ..။ အခြားသူတွေကို ဝန်မပိစေချင်လို့ Facebook မှာ မွေးနေ့ကို ဝှက်ထားပေမယ့်လည်း တစ်ယောက်ကနေတစ်ယောက် သိရှိသွားတာနဲ့ Birthday wish လုပ်ကြတဲ့ သူငယ်ချင်း၊ အစ်ကို၊ အစ်မ၊ မောင်လေး၊ ညီမလေးတွေရဲ့ စာသားတွေကလည်း ကျမရဲ့ ပျော်ရွှင်မှုကို ပိုပြည့်စုံစေခဲ့ပါတယ်...။
 ပန်းရောင်ချစ်တဲ့ ကျမအတွက် ပန်းနုရောင် လက်ဆောင်..။




Follow Us @soratemplates